السلام عليكم بزاف يتساءلو على طريقة المخبز كيفاش يجي معسل لداخل و طريقة الطلية و الرسم بالطلية
المقادير :
- كلغ غ لوز مرحي
- 500 غ سكر عادي
- 10 ملاعق مرغرين ذايبة
- ملعقة مرغرين لكل 100 غ لوز ،بيض
- مبشور الليمون
الطلية :
- كيلةحليب
- كيلة زيت
- كيلةماء زهر
- سكرناعم
طريقة التحضير :
اولا الملاحظة الي ذكرتها سابقا لوز كي تنسلوه خليوه ينشف مليح باش تنجحلكم الحلوة و تجيكم معسلة ،عمركم ما تنشفو اللوز في الفور ،حطوه في بلاصة بعيدة على الشمس خطراش في الشمس يغمل و يفسدلكم
نديرو اللوز مع السكر نونزيدو مبشور الليمون كثرو باش ينحيلكم ريحة البيض و مرغرين ذايبة دايما في الحشو نستعملو لكل 100 غ لوز ملعقة كبيرة ليدام . نخلطوهم مليح ونجمعو بالبيض ،هنا البيض نستعملو بيضة كاملة مع صفار نخلطوهم ونضيفو غير بالشوي حتى يكون حشو طري،لازم تعجنو الخليط مليح بيديكم ماشي بصباعكم لانو كان تعجنوه بالاصابع رايحين تخرجو منو ليدام ،اعجنوه مليح يدخل السكر في اللوز ،العجينة تكون طرية شوي باش كي يريح راح ينشفلكم شوي يجي قدقد ،خليوه يبات ليلة كاملة يعطيك نتيجة روعة او اعجنوه صباح و طيبوه لعشية،
بالنسبة للبيض كل وحدة ومقدورها الي تحب تخدم غير بالصفار تجيكم حلوتكم طرية بصح تضيعي بزاف البياض ،كي تكون كمية كبيرة تاع عرس مثلا تخدمي بزوج بيضات مع واحد صفار وتبقاو تعجنو حتى تكملو كامل الكمية .
رشو سطع العمل بشوي فرينة و حلو العجينة نتاعكم وديروها عالية باش يجيكم باهي ،قطعوه بااي شكل الي حبيتو
حطوها في صينية الفور و تكون مرشوشة مليح بالفرينة خطراش حلوة اللوز تلصق ،نطيبوها على 160 درجة و يكون فور سخون من قبل ،ما لازمش يكون فور بارد ولا درجة اقل من هاذي خطراش كي تكون درجة هابطة تاع الحرارة رايح يتنفخلك البيض يشققلك الحبة من بعد تعاود تهبط .
كي يطيب يدي لون ذهبي فاتح نحيوها و نخليوها تبرد مليح باش نطليوه من الاحسن تخليوها نهار كامل او ليلة باش نديرو الطلية .
الطلية : ذكرتلكم سابقا انواع الطلية ،وطبعا احسن وحدة هي الي تحكمنا شهر وتبقى طرية ،
كيلة زيت +كيلة حليب+كيلة ماء زهر تخلطوهم وتزيدولهم سكر ناعم مغربل مرتين حتى تتحصلو على عجينة ،من بعد حلوها بعصير لليمون حتى تتحصلو على القوام المطلوب .ما ديروهاش جارية بزاف لازم تكون ثقيلة باش تجيكم باهية.
اطليو الحلوة نتاعكم على مرة ،يعني حطوها فوق الشباك الي عندكم شوفو شحال يهزلكم من حبة وهزو بالمغرفة وغطيو الحبات الي مبتدئة تقدر تستعمل ايدها تهز بيها ،اخبطو هاذاك الشباك بالشوي باش يهبلطكم الزائد تاع الطلية ،عاودو اجمعو الطلية الي طاحت من تحت وكملو الحبات كامل الي عندكم،هاذي طريقة سريعة افضل انكم تطليو بالحبة .
في حالة استعملتو الطلية الي تجي ببياض البيض او طلية السيرو كي تخلطوها بالخلاط كهربائي ما تخليوهاش توصل لقوام المورانغ ،اذا جاتكم مورانغ رايحة طلية تجيكم يابسة و تتكسر
في حالة غلطتي ودرتي طلية يابسة كي تكملي الطلية و ييبس القاطو حطيه في علبة فرشيلها طرشون وحطي القاطو نتاعك و زيدي اغلقي مليح بالورق الشفاف ثم اغلقي العلبة بالمغط نتاعها ،وخليها يوم او يومين رايحة تلقاي الطلية نتاعك طرات .
بالنسبة للتزيين بزاف الي يسقسيوني على الطلية الي نرسمو بيها الحرقوس ،و الطريقة الصحيحة للرسم .
نستعملو الطلية روايال في الحرقوس : بياض بيضة كسروه شوي من بعد زيدولو السكر مغربل 3 مرات ،وحركوه مليح بشرط ما لازمش توصلو للقوام تاع ميرانغ ،كي تتحصلو على عجينة زيدولها شوي ماء زهر و شوي عصير ليمون ،لازم يكون قوام نتاعو مليح ،مالازمش ديروه يابس يتقطعلكم خط الرسم ،وما ديروهش جاري تسحيلكم الطلية ،
السر في الطلية لازم يكون سكر ناعم منخول جيدا ،باش كي تجيو ترسمو ما يجيوكمش الحبيبات يفسدولكم الرسم
في الرسم استعملو الكيس الحلواني ،وتعلمو في صينية او ورق زبدة او سطح العمل حتى تمشي يدكم مليح في الرسم،وتعلمي الخطوط الاساسية من بعد تعلمي الزركشة الاخرى .ماش لازم تكون عندك الحلوة باش تتعلمي الرسم ،كي تشوفي روحك عندك وقت اخدمي شوي طلية و ابقاي تتعلمي في اوقات فراغك حتى تتمكني منو.
كي تجي ترسمي هزي يدك لازم يكون الخط نتاع الطلية مرتفع شوي باش يجيك الرسم مسقم وتقدري تتحكمي فيه،
تقدري تستعملي الملمع الغذائي قبل او بعد الرسم انت و ذوقك
بالنسبة للاشكال الي تحطيها من فوق السوق راهو معمر بمول السيليكون اختاري الي يعجبك و شكليه بطريقتك و ذوقك
تقدري تستعملي عجينة السكر و تقدري تستعملي عجينة اللوز انت ومقدورك ،اذا اخترتي عجينة السكر خيري نوعية جيدة الي ما تتلاصقش كي تقيسها الميديتي .
في الطلية استعملي الملون الغذائي في الماء واضيفي بالشوي حتى تتحصلي على اللون المطلوب
في حالة درتي كارثة وجاك اللون غامق اكتر ما كنتي حابة اضيفي ملون غذائي الابيض حتى تتحصلي على اللون المطلوب،يعني ملون غذائي ابيض دايما اشرو منو بالميزان وحطوه جانبا تحتاجوه .
بالنسبة لكلغ لوز يخرجلكم 60 حبة مخبز حبة صغيرة نوعا ما وعالية ،تستعملو كاس اتاي في الكيل تاع الطلية ،،و يديلكم 2 شكاير سكر ناعم تاع المرجان
اي سؤال انا في الخدمة
شكرا على كل المعلومات حبيبتي يجعلها في ميزان حسناتك