طريقة تحضير شخشوخة الشواط بالتفصيل الممل

السلام عليكم متابعي موقع الف وصفة باذن الله كل مرة نحطلكم وصفة و نشرحها و نستقبل اسئلتكم ان شاء الله
اليوم مع الجو البارد جبتلكم طريقة تحضير الشخشوخة تاع الشواط معروفة بيها منطقة مسيلة
نبداو على بركة الله
العجين :

دقيق رقيق من الاحسن يكون نوعية مليحة بااش يعطيك نتيجة روعة انا نستعمل عمر بن عمر او بن حمادي ،ملح و تلميها بالماء حتى ترجع طرية
اعجنيها مدة 3 دقائق حتى تولي طري

،ما تتعجنش كيما المسمن لالا ،هنا نعجنوها شوي باش ديرلنا العلك لانو هو الي يخلي العجينة كي نطيبوها و نهرسوها ما ديرلناش هذاك الفتات الرقيق،ا
نقسمو العجين الي كويرات وزنها تقريبا 200غ يعني كي دخلي العجين في الكااس تجي تقريبا كاس غير ربع

نخليوها تريح نص ساعة وكل ما ريحت تكون افضل
نبداو نقرصوها لازم تكون رقيقة السمك تاعها كيما في الصورة،نقرصوها بالماء ماشي بالزيت ما تخافوش ما يصرالها والو ،والي تخاف تقدر تستعمل الزيت بدلا من الماء

نطيبوها فوق طاجين الحديد ما تحمروهاش بزاف ديروها كيما في الصورة

،،من بعد مباشرة وهي سخونة قطعوها اطراف و حطوها في المهراس و اخبطوها كي تخرجوها من مهراس حطوها في القصعة وحكوها بيديكم في زوج باش تفتت.الي يبقالكم قطع كبيرة من المهراس زيدو فتوهم بيديكم

– تقدرو تستغناو على المهراس و مباشرة تفتوها بيديكم .هنا دور المهراس هو يساعدكم كي تكون الكمية كبيرة .

كملو كامل الكمية الي عندكم بنفس الطريقة،
المرق: كمية تاع 3 اشخاص
– حبة بصل نقطعوها كيما نتاع الشكشوكة والي ما تحبش تقدر ديرها مقطعة رقيق ديرولها الملح و التوابل و ذبلوها مليح في الزيت من بعد حطولها حبة طماطم كبيرة ،و دجاج ما تكثروش بزاف لانها تجي بنينة بلا ما ديرو كمية كبيرة ،قليوهم مليح و زيدو ملعقة كبيرة طماطم و فلفل عكري حلو والحار حسب الرغبة ومع راس فلفل حار احضر و مرقوها ،واغلقو عليها وخليوها طيب على نار هادئة حتى تطيب وتكون ثقيلة كيما في الصورة .
طريقة تقديمها :
تحطو الصوص في مقلى او طاوة تسخنو المرقة تاعكم مليح تديرو فيها مغرفة صغيرة زبدة لكل صحن ،وتحطو فيها الشخشوخة الي حضراناها قلبوها شوي برك بلا ما تخليوها تغلي تنحيوها لازم تكون مشمخة مليح ما ديروهاش ناشفة
مباشرة تحطو عليها فلفل اخضر مقطع و دبشة و بصلة مقطعة رقيق ،الي ماييحبش البصل يقدر يستغنى عليه.

– هنا صورة التقديم حضرتلكم الطبسي رحت نجيب التليفون لقيتهم كلاوها لحقتلكم بالمغارف لخرين معليش المهم ان شاء الله تكونو فهمتو
– بعض النصائح :
– االعجين تاع الشخشوخة دايما نعجنوه باش نتحصلو على العلك كي تجبدي العجين للفوق تلقايه يتكسل كيما في الصورة لانو العلك هو الي يخليها ما تديرلكم الفتات الرقيق الي يبقى من تحت وهو الي كي تسقيوها يولي كي العجين
– البصلة دايما كي تجيو تقليوها ديرولها الملح باش يخليها تطلق الماء الي فيها و تذبل مليح
– الطياب هنا يكون سخون في سخون يعني استعملو الماء السخون كي تمرقو
– التوابل الي استعملتهم انا نشريهم و نخلطهم وكل ما نجي نستعملهم نحمصهم شوي باش يطلقوا ريحة مليحة ،(هنا تقدرو ديرو فلفل اكحل وكسبر وكمون و كروية )
– كثروا الفلفل الحار لانو سر بنتها في الحرارة .يم يم في البرد حارة و سخونة
– العجين الافضل تقرصوه بالماء خير لانو الزيت يخليها ما تشربش المرق مليح.
– المرة الجاية ان شاء الله نديرلكم الزفيتي او سلاطة مهراس الي عندها مهراش اوك والي ما عندهاش نعطيها الطريقة بدون مهراس.
اي سؤال انا في الخدمة