حلويات

طريقة تحضير حلوة الطابع

حلوة الطابع حلوة تقليدية تقدرو تبداو بيها مشروع مصغر عجينة واحدة وتعطيكم اشكال كثيرة .

المقادير : 
– 4 حبات بيض
– 200 غ سكر
– 200 ملل زيت
– كيس ونصف الى 2 كيس خميرة كميائية
– مبشور ليمون
– ملعقة كبيرة سكر فانيلا
– فرينة (طحين -فورص)
للدهن :
– بيضة كاملة + م صغيرة فانيلا + م صغيرة قهوة سريعة الذوبان
للتزين : 
– سكر غربلوه في صفاية رقيقة نستعملو الخشين
– حلوة فارميسال
– نخلط البيض مع السكر ،السكر فانيلا ومبشور الليمون و الزيت بالخلاط كهربائي او مضرب يدوي او حتى كف اليد حتى تتجانس المكونات جيدا ثم نضيف الفرينة الي كنا غربلناها من قبل ونضع معاها الخميرة ،نبقاو نخلطو حتى نتحصلو على عجينة متماسكة ما تتلاصقش في اليد
– نحلو العجين على طاولة عمل مرشوشة بالفرينة ونقطعو الحوى بالطوابع التقليدية المعروفة و تكون العجينة بسمك 2 سم الى 23 ملم ،وهذا هو سر من اسرار حلوة الطابع انها تكون سميكة ،
– البقايا من العجين تجمعوه دون عجن وتعاودو تحلوه .
نحطوها في صينية الفرن ندهنوها بالبيض ونزينوها اما بالسكر او حلوى الشربة (فارميسال)
– نطيبها في فرن مسخن مسبقا على درجة 180 درجة ،تقريب 25 الى 30 دقيقة حتى تتحمر مليح
– من علامات نجاح حلوة الطابع هو ظهر تشقق على سطح حبة الحلوى
– اذا زينتو بالسكر حطوه في وسط الحبة فقط ما توزعوهش على الحبة كاملة لانو ما يخليش الحبة تنتفخ كما يجب .
– اهم ملاحظة لازم حلوتكم تكون منكهة يدا بالليمون و الفانيلا باش ما تجيش فيها ريحة البيض .
– هذه العجينة هي نفسها عجينة الكروكي ،و عجينة حلوة الطلية التقليدية و حلوة اللمبوط ،وايضا حلوى المبروشة
-اذا درتو بيها حلة الطلية نقصو من سمك العجينة ما لازمش تكون بنفس ارتفاع حلوة الطابع يعني بدل ما ديرو 2 سم ديرو 1 سم،و الطلية استعملو الي حطيتهالكم من قبل في درس العرايش
– اذاددرتو حلوة اللمبوط لازم تخليو العجينة طرية نوعا ما باش تخرجلكم من اللمبوط
-وتقدرو نفس العجينة تشكلو منها هليلات او اساور و ترمدوهم في السكر فقط انتبهو للحجم لازم يكون صغير لانو فيها كمية معتبرة من الخميرة .
– الحلوة المبروشة تحلو العجينة سمك 1 سم و تفروشوها في صينية الفرن وتدهنوها جيدا بالمربى النوع الي تحبو ،من بعد تحكمو شوي عجين تضيفولو الفرينة باش تتحصلو على عجينة صلبة نوعا وابرشوها من فوق .بعد ما طيبوها ترشها بالسكر ناعم و تقطعوها وهي ساخنة بالطريقة الي تحبو سواء مربعات او مثلثات او معينات
– بالنسبة الي حبو يسترزقو منها ،كي تحضروها ديروها في اكياس غذائية كل كيس فيه 10 حبات وتحطو تاريخ الانتاج نتاعها، السعر تحدوه حسب المقادير الي استعملتوها ،وعادة حلوة الطابع تكون من 10دج الى 20 دج للحبة حسب الحجم نتاعها .هذه الحلوى مطلوبة بكثرة عند اصحاب المقاهي .

اظهر المزيد

موقع الف وصفة

يختص هذا الموقع بتقديم اشهي وأطيب الأطباق العربية لجيمع أنواع االاكلات المالحة والحلوة سهلة التحضير وبمواد بسيطة والمقادير المضبوطة والمجربة والناجحة

مقالات ذات صلة

اترك تعليقاً

لن يتم نشر عنوان بريدك الإلكتروني.

 

زر الذهاب إلى الأعلى
إغلاق