كيما عودتكم كل مرة اليوم جبتلكم طريقتي في تحضير العصير الطبيعي ، كامل عارفين انو العصير الي يتباع برا يكتبو عليه طبيعي وفي الحقيقة هو مجرد مركزات سكرية ،رانا في فصل الشتاء اغتنموا الفرصة و حضرو عصائر بيديكم لاولادكم و عائلتكم حاجة طبيعية و نظيفة بدون مواد حافظة
طريقة تحضير مركز عصير البرتقال ، البامبلوموس و الليمون ، انا نستعمل نفس الطريقة لهاذي الفاكهة .نبداو على بركة الله
كي يهبط سعر الليمون و البرتقال و البامبلوموس اشريو كميات كبيرة من نقاط البيع بالجملة يعني روحو للمرشيات تاع الجملة و اشريو كميات كبيرة تحتافظو بيها حتى للصيف ان شاء الله و رمضان
نعطيكم مقادير كلغ وانتوما طبقوه مع الشيء الي عندكم
اولا تغسلو كلغ القارص من بعد تنحيلو المبشور كيما راهو موضح في صورة رقم 1
تعصرو القارص و توزنو العصير الي تحصلتو عليه مثلا تحصلتو على 800غ عصيرقارص
ضيفولو نفس الوزر سكر يعني 800غ سكر كيما موضح في الصورة 2
وزيدولو المبشور
يعني هكذا يكون عندنا خليط عصير القارص و السكر و المبشور كل ربع ساعة حركوه مليح بالمغرفة حتى تشوفو بلي السكر ماعادش يتكتل من لتحت . تخليوهم يباتوليلة كاملة كيما موضح في الصورتين 3 و 4
بعد ما باتو ارحيوهم في ميكسور وصفيو العصير بالصفاية و الي يبقى فوق الصفاية تزيدو دخلوه الميكسور تزيدولو قليل من الماء و ارحيوه حتى يكمل كيما موضح في صورة 5
طريقة الحفظ :
الشيء الي تحصلنا عليه هو مركز الليمون ،اما تفرغوه في اكواب – قوبلي – صورة رقم 7 وتحطوه يجمد او تفرغوه في اكياس ،تحطو كيس غذائي في كاس من بعد تعمروه بالعصير و تغلقو الكيس-الصورتين 6- و تحطوه في المجمد
طريقة الاستعمال :
كي تحبو تستعملوه فرغو الكيس او قوبلي الجامد في ميكسور و ضيفولو تقريبا لتر ناقص كاس ماء تتحصلو على عصير منعش و لذيذ
ملاحظات :
كي تكونو تبرشو في القارص او التشينة او البامبلوموس حاولو ما تنحوش القشرة البيضاء الي لداخل لانها ديرلكم في مرارة للعصير
ما تستعملوش القارص الي قشرتو خضرة يعطيكم ذوق مر اضافة الى لون عصير اخضر
مركز لليمون تقدرو تحضرو بيه الشربات تضيفولو علبة ياغورت او تحضرو بيه عصير ليمون بالنعناع تضيفولو نعناع او نعناع و زنجبيل يجيكم روعة
باش تفرقو بين اكياس القالرص و بامبلوموس ،اعقدو كيس القارص مرة وحدة و كيس بامبلوموس مرتين ،اما كيس البرتقال لونو واضح ما يتخلطلكمش
كي تتجمد الاكياس و الاكواب اجمعوهم كامل و رتبوهم باش ما يديولكمش بلاصة في المجمد
بالنسبة لعصير التشينة كي تبيتوه و تتحصلو على المركز ديرو لكل 1 كلغ مركز عصير برتقال عصير زوج كيسان ليمون لانو تشينة التعصار عادت تجي شوي حلوة .
مركز البامبلوموس ديرو لكل كلغ مركز بامبلوموس ضيفولو كاس عصير ليمون .
صحتين و عافية و اي سؤال انا في الخدمة
