العرايش و اسرار نجاحها

السلام عليكم ، واش راكم حبيباتي ، اليوم ان شاء الله نقدملكم درس العرايش و اسرار نجاحها ، بزاف الي عندهم مشكل في تشكيل العرايش

يخرج الحشو من الحبة او الحشو يكون يابس

او حبة العرايش تجي فارغة داخل الحشو يهبط لتحت

او الاعراف ثلاثة تاع العرايش ما فيهيمش اللوز او الطلية يابسة

نبداو على بركة الله الدرس

المقادير :

3 كيلات فرينة تكونو غربلتوهم زيديولها كيلة سمن ذايب و بارد دايما نقولكم في حلويات ديرو سمن بارد لانو السخون يكلحكم في الماء

دخلو مليح السمن في الفرينة، ملعقة سكر ناعم هنا اختيارية انا نحب يكون فيها السكر يعطيها ذوق ،رشة ملح خفيفة ما تكثروش،ملعقة فانيلا ،و اجمعو العجين بالماء وماء زهر

كيما كل مرة نقولكم كيفاش تعرفو العجين بلي راهو مليح ما تزيدولوش الماء ،احكمو شوي عجين حربشوه في يديكم وطبقوه على زوج ، اذا تفتت اعرفو بلي مزال ،اذا ما تكسترلكم يعني راهو الماء قدقد

خليوهاتريح من الاحسن تبات ليلة كاملة ،كل ما ريحت كل ما تعطيكم الطوع في الخدمة و حبة العرايش رطبة من فوق ماشي حرشة هكذا تقدر تطليوها بلا ما تفسدلكم الطلية .

الحشو :      

3 كيلات لوز مرحي(او 2 كيلات ونص لوز و نص كيلة جوز) ،كيلة ناقصة صبع سكر ،فانيلا ،وسمن حسب الكمية نتاع الحشو القاعدة دايما لكل 100 غ لوز ديرو ملعقة كبيرة سمن)،،نجمعوها بالماء زهر واعجنوها مليح يدخل السكر في اللوز ،ما لازمش يكون الحشو يتلاصق في اليد ،اذا كان الحشو طري بزاف رايح يخرجلكم من حبة العرايش و يتحرق، خليو الحشو يريح باش لوز يجيكم معسل لداخل .في حالة لقيتوه نشف بعد ما ريح زيديلو شوي ماء زهر .

– تقدرو تعوضو اللوز بالكوكاو شرط لازم تحمصوه كيما دايما نقولكم على نارهادئة ،وديرو 2 كيلات كوكاو مع نص كيلة سكر ارحيوهم مع بعضاهم و زيدولهم السمن و اعجنوهم بماء زهر

طريقة تشكيل العجين :     

كورو العجين نتاعكم كريات 30غ واخدموهم مليح بيديكم رطبوهم خطراش السمن لداخل يكون جامد،ما دسروش الطريقة القديمة نتاع تحلو العجين و تقطعوه دوائر هاذي تعبكم بزاف وكل مرة لازم تخليو العجين يريح باش تقدرو تكملو

حلو الكويرات بيديكم و ديرو الحشو نتاعكم على شكل حرف T وزن الحشو يكون بين 10 حتى 15 غ اغلقوها مليح من تحت من بعد حطو يدكم في الوسط اضغطو ومشيو صباعكم مع الاعراف نتاع العرايش لازم تحسو بلي الحشو راهو يتحرك لداخل ،هكذا كي تجيو تاكلوها تلقاو حشو فيها كامل ماشي تلقاو حشو في النص و الاعراف فارغين . من بعد حطو الحبة بين صباعكم (الابهام ،الوسطى و السبابة )و دورو عرايش عليهم هكذا حباتكم كامل يجيوكم قدقد على يد وحدة

ديرو فيها ثقبة في النص باش حبة العرايش تتهوى و كي تفتحو الحبة ما تلقاوش فراغ فوق الحشو، كي تشكلوها خليوها خليوها تريح قد ما قدرتو نص ساعة حتى ل 2 سوايع باش الشكل يبقى كيما راه ما يتبدلش كي يطيب و العراف يبقى شكلهم كيما حطيتوهم.

طيبوها على درجة 180 درجة نحيوها و خليوها تبرد

القلاصاج :  

كاين انواع بزاف نتاع الطلية ،خضوها قاعدة أي طلية فيها بياض البيض تجي يابسة خصوصا في الصيف .نعطيكم بعض انواع الطليات

طلية الشاربات :  

قيس 20 حبة عرايش بياض بيضة +نص كاس شربات عاقد شوي وتزيدولها باكي السكر ناعم حتى ترجع كي العجينة من بعد تعاودو تحلوها بالقارص و ماء زهر..عيوب هاذي القلاصاج انها تجي يابسة

طلية روايال : 

بياض بيضة كشروها شوي بفرشيطة زيدولها سكر حتى تولي عجينة من بعد حلوها بماء زهر و القارص ،عيوبها تجي يابسة ،وهاذي مليحة فقط للرسم لانها تنشف ثم ثم.

الطلية الي نفضلها وتجي طرية و تشد لمدة شهر كامل :   

كيلة حليب زيدولها كيلة ماء زهر و كيلة زيت و ديرولها سكر مغربل حتى توليلكم عجينة من بعد حلوها بالقارص وديرولها اللون الي حبيتو،

دور القارص هنا هو ينقصلنا حلاوة السكر

العرايش الافضل تخليوها بعد الطياب ليلة كاملة باش تطليوها ،باش تبرد مليح وتشرب كامل ليدام الي فيها ،خطراش اكتر حاجة تفسد الطلية هي سمن ولا مرغرين الي يطلقو القاطو .

اطليوها على خطرة ،ديرو قرياج وحطو فوقو الحبات على خطرة وحطو سنيوة من تحت ،فرغو الطلية بالمغرفةعلى كامل الحبات هكذا تقدرو تطليو 50 حبة على مرة تقدرو حتى تستعملو يديكم باش تجيكم ساهلة ،الي ما عندهاش قرياج تاع الحلويات تستعمل شباك الفور ولا تاع فريجيدار هكذا تطليو كامل الحبات على خطرة ،اخبطو مليح قرياج تاعكم و خليو الطلية تنشف و زينوها على طريقتكم

اي سؤال انا في الخدمة